النهاردا ان شاء الله هشارك معاكم الطريقه اللي كنت بذاكر بيها في الثانويه العامه ....ولكن قبل ما ادخل في التفاصيل , هو أنا ليه أصلا بشارك الموضوع دا معاكم؟
الاجابه : ان دي طريقه ساعدتني اني اجيب 98.4% في ثانيه ثاوني و 99.4% في ثالثه ثانوي . وكمان لأني للأسف مش لاقي حد من الناس المتفوقين او الناجحين بيشارك طريقة مذاكرته والاوقات اللي بيذاكر فيها .....الخ بحيث ان الناس تستفيد منه .
وحيث اني أصلا بحب التفاصيل الممله واحب لما حد يكلمني عن حاجه لا يهمل التفاصيل دي فقررت أعمل الموضوع والفيديو دا من ضمن سلسلة الفيديوهات الخاصه بالثانويه العامه والمذاكره عامةً.
لو ما لكشي طولة بال للقرأه فشوف الفيديو دا علاطول , ولو أن الافضل انك تشوف الفيديو وتقرأ المقال من أجل الاستفاده المثلي :)
نبدأ علي بركة الله , بدايةً كنت بصحي من النوم قبل الفجر بساعتين سوءً صيف او شتاء بقوم أصلي قيام الليل و أقرأ ربع من القرأن وأدعوا الله أن يرزفني الفهم وأبدأ في المذاكره.
كنت ببدأ بالحاجه السهله والمحببه ليا , واللي هي الرياضيات , ببدء بحل مسائل بسيطه وبتتدرج في الصعوبه لحد ما احل مسأله صعبه ودا كان بمثابة تسخين أو تأهيل للبدء في المذاكره .
بعد كدا بذاكر الماده او الجزئيه اللي عايز اذاكرها . وكانت المذامره علي مدار اليوم متنوعه بين مواد حفظ و مواد فهم و مواد حل
بحيث ان الواحد ما يملش من مذاكرة نوع واحد من المواد.
كنت بذاكر لحد أذان الفجر وبعدين أروح أصلي الفجر , ودي كانت فرصه للراحه من المذاكره أو Break بحيث ان الواحد يرجع يكمل بنشاط.
برجع من صلاة الفجر اكل حاجه خفيفه و أكمل مذاكره لحد الصبح ما يطلع . وبعدين لو كان فيه درس كنت بروحه وبردوا الدرس كانت فرصه لـ Break بأقابل فيه أصحابي ونتكلم ونهزر....الخ .والشئ المهم اللي كنت بعمله قبل أي حصه في الدرس اني كنت براجع علي الدرس اللي فات سريعا وبقرأ الدرس اللي هنأخده سريعا ودا كان له مفعول السحر .
طبعا الدرس الجديد اللي بقرأه لأول مره مش فهم منه كتير , لكنه كان بيديني نبذه عن الموضوع ودي كانت بتفرق جدااااااا لما المدرس كان بيشرح الدرس . تقريبا كنت الوحيد اللي بيتفاعل معاه لاني عندي معرفه مسبقه بالموضوع دا من خلال القرأه السريعه زي ما قلت . وكمان الموضوع بيثبت في دماغي بصوره ممتازه.
بعد ماكنت بخلص الدرس أو الدرسين كنت بروح البيت علي الضهر كدا . كنت بصلي الضهر وأخد قيلوله لحد العصر .
ويالله علي مفعول القيلوله دي , كنت بقوم من النوم منتعش ومركز ونفسي مفتوحه أكمل مذاكره.
كنت بكمل مذاكره من بعد العصر لحد المغرب . بس كدا انا خلصت مذاكره في اليوم دا
من المغرب للعشا كنت بروح أجري و أتدرب مع صديقي يحي وأقابل أصحابي و نتمشي .
وموضوع الجري أو الرياضه عامة كان ركيزه أساسيه في استيعابي الدراسي ومداومتي علي المذاكره . الجري والرياضه كانوا بمثابة منفذ للضغط والقلق والتوتر وكل الحاجات الرخمه دي . الجري بيفرز هرمون الاندروفين اللي بيخليك مبسوط وسعيد .
وما كنتش بأ حال من الاحوال بسهر عن الساعه 11 مساءً ودا لأني كنت قرأت ان التركيز والاستيعاب بيقل للنصف بعد الساعه 11 مساءً وكمان لأني بقوم قبل الفجر بساعتبن زي ما قلت لك في الاول :)
ملاحظات مهمه :-
1- كنت كل 45 دقيقه مذاكره باخد 15 دقيقه راحه . كنت بقوم أفرد ضهري , ألعب شوية ضغط , أطلع في البلاكونه وأريح عيني شويه من البص في الكتب . كنت بعمل أي حاجه أفصل بيها عن جو المذاكره شويه .
2- كنت بأكل فاكهه كتير وخاصة ( الموز والتفاح ) والسناكس كانت سندوتش تونه ودا لأنها غنيه بـ Omega 3 ودا اللي بيساعد في تنشيط المخ وزيادة الاستيعاب.
3- أشرب الحاجه المرتبطة بالتركيز عندك سوء كاننت " شاي - قهوه - نيسكافيه ...الخ " وانت بتبدأ تذاكر , الموضوع دا رغم انه بسيط الا انه بيدخلك في مود التركيز و المذاكره.
4- ما كنتش بذاكر بعد الاكل مباشرة ودا لأن أصلا الدم بيروح للمعده عشان عملية الهضم والواحد بيكون مكسل ومش مركز خالص.
5- الصلوات كانت عباره عن Breaks ممتازه وفرصه انك تقوم من علي الكرسي وتروح تصلي وتقابل الناس و تفك شويه من المذاكره.
6- يوم أجازه من المذاكره , كان يوم الجمعه هو أجازتي من المذاكره وفرصتي أني اعمل اي حاجه تانيه غير المذاكره , سوء اتفرج علي افلام , اقابل اصاحبي , ازور قريبي او Enjoy doing nothing , المهم ماكنتش بذاكر نهائيا في اليوم دا لأن الواحد محتاج فرصه للنقاهه عشان يبدأ الاسبوع الجديد فريش :)
نيجي بقا لسؤال مهم : هل لو أنت عملت الخطوات دي هتفع معاك ؟
الاجابه : ممكنلكن السؤال الأهم علي الاطلاق : هو إزاي أنا توصلت للطريقه دي بالذات في المذاكره ؟ وإزاي انت كمان تقدر تحدد أفضل طريقة للمذاكره بالنسبه لك ؟
وان شاء الله دا موضوع الحلقه الجايه في السلسله دي .